بلد الرجالة والتجار قالوا جاي

وجه الإعلامي تامر أمين، إشادة بقرار البورسعيدية بمقاطعة الأسماك بعد ارتفاع أسعارها بصورة كبيرة خلال الفترة الأخيرة رغم نزول أسعار الدولار.

مقاطعة للبورسعيدية 

وقال “أمين” خلال تقديم برنامجه “آخر النهار” المذاع على فضائية “النهار” مساء اليوم الأربعاء، “بورسعيد بلد الرجالة واللي بنطالب به الفترة الماضية فكرة المقاطعة الشعبية إحنا قولنا كتير أه فيه أزمات اقتصادية ولكن فيه مغالاة وتربح زائد من بعض التجار اللي ضمايرها ماتت”.

وأضاف “بعض التجار رغم انخفاض الدولار قالت مفيش نزول، وعايز يعلي هامش ربحه طمع، يقوم البورسعيدية عملوا في أهم سلعة اللي عندهم وجبة أساسية على مائدة البورسعيدية لما لاقوه أن أسعار السمك غالية رغم أن الأسعار نزلت قرر البورسعيدية على السوشيال ميديا مش هنشتري سمك وهنقاطع السمك”.

تسعيرة جبرية في السمك 

وتابع “وحصل المقاطعة بصوا على منظر حلقة السمك امبارح اللي مكنتش تشوف شكل الرخام من كتر البشر الموجودين فيها، فاضية تمامًا وبعد 48 اضطر تجار السمك ينزلوا الأسعار بنسب من 30 إلى 40% و50% فالتجار قالك جاي حقي برقبتي ده أول درس أن المقاطعة الشعبية مش كلام فاضي بس المقاطعة عايزة رجالة”.

كما عرض تامر أمين مقطع فيديو لأحد تجار السمك الكبار وهو يطلب من أحد التجار رغم أنه يشتري السمك بأسعار منخفضة أن يبيعه بأسعار مرتفعة ويقوم بفرض تسعيرة على تجار السمك ويطالب زملائه بعدم تخفيض الأسعار في بورسعيد.